गाउँको मैदानबाट एनपीएलसम्म : राहुल यादवको प्रेरणादायी क्रिकेट यात्रा

काठमाडौं, १३ कात्तिक। गाउँको सामान्य क्रिकेट मैदानमा बलिङ गर्दै राष्ट्रियस्तरको प्रतियोगितामा पुग्ने सपना देखेका रौतहटका राहुल यादव अहिले नेपाल प्रिमियर लिग (एनपीएल) को तेस्रो संस्करणमा चर्चाको केन्द्रमा छन्। बौधिमाई नगरपालिका–१, अजगैबीका राहुलले जनकपुर बोल्ट्सबाट खेल्दै आफ्नो बलिङ क्षमतामार्फत क्रिकेटप्रेमीको ध्यान खिचेका छन्। उनको यो सफलताले ग्रामीण क्षेत्रमा लुकेर रहेका प्रतिभालाई उचित अवसर मिले राष्ट्रियस्तरमा स्थापित हुन सक्छन् भन्ने सन्देश दिएको छ।

राहुलको एनपीएल यात्रा कुनै ठूलो क्रिकेट एकेडेमी वा स्थापित प्रतियोगिताबाट सुरु भएको होइन। स्थानीय क्रिकेट क्लबमा आबद्ध भएर अभ्यास र विभिन्न स्थानीय प्रतियोगितामा सहभागी हुँदै उनले आफ्नो खेल कौशल निखार्दै लगेका थिए। रौतहटको चन्द्रपुर क्रिकेट एकेडेमीमा नियमित अभ्यास गर्ने राहुललाई परिवारको साथ र मधेश क्षेत्रका अनुभवी क्रिकेट खेलाडीहरूको मार्गदर्शनले अघि बढ्न थप हौसला मिल्यो। क्रिकेटप्रतिको लगाव, निरन्तर अभ्यास र मेहनतकै कारण उनी स्थानीयस्तरमा आफ्नो पहिचान बनाउन सफल भए।

राहुलको प्रतिभाले ठूलो मञ्च पाउने अवसर भने जनकपुर बोल्ट्सले एनपीएलको तेस्रो संस्करणलाई लक्षित गर्दै आयोजना गरेको ट्यालेन्ट हन्ट कार्यक्रमबाट प्राप्त भयो। जनकपुर बोल्ट्सले चन्द्रपुर नगरपालिका–८ स्थित बेतौना मैदानमा आयोजना गरेको प्रतिभा छनोट कार्यक्रममा राहुल पनि सहभागी भएका थिए। उक्त कार्यक्रममा देशभरबाट ४४६ जना खेलाडीले नाम दर्ता गराएका थिए। त्यति ठूलो प्रतिस्पर्धाबीच राहुलले आफ्नो बलिङ क्षमता, फरक बलिङ एक्सन, गति र खेल कौशलबाट छनोटकर्ताको ध्यान खिच्न सफल भए।

ट्यालेन्ट हन्टमा छनोट भएपछि राहुलले जनकपुर बोल्ट्सको प्रशिक्षण शिविरमा सहभागी हुने अवसर पाए। त्यहाँ पनि उनले आफ्नो क्षमता प्रमाणित गरे। अभ्यासका क्रममा अनुभवी खेलाडीविरुद्ध गरेको प्रदर्शनले प्रशिक्षक तथा टोली व्यवस्थापनलाई प्रभावित पारेपछि उनी जनकपुर बोल्ट्सको टोलीमा समावेश भए। ट्यालेन्ट हन्टबाट आएका खेलाडीले सुरुमै प्लेइङ–११ मा अवसर पाउनु सहज थिएन। तर प्रशिक्षक र कप्तानको विश्वास जित्दै उनले पहिलो खेलमै मैदानमा उत्रिने मौका पाए।

राहुलको एनपीएल डेब्यु आफैँमा अविस्मरणीय रह्यो। त्रिभुवन विश्वविद्यालय (टियु) अन्तर्राष्ट्रिय क्रिकेट मैदानमा कर्णाली याक्सविरुद्ध भएको खेलमा उनले आफ्नो पहिलो बलमै विकेट लिएर सनसनी मच्चाए। कर्णालीका दीपक डुम्रेलाई पहिलो बलमै आउट गरेका उनले त्यसपछि पाकिस्तानी खेलाडी हुसेन तलतलाई समेत पभेलियन फर्काए। डेब्यु खेलमा चार ओभर बलिङ गर्दै १५ रन खर्चेर दुई विकेट लिन सफल भए।

पहिलो खेलको सफलताले उनको आत्मविश्वास बढायो। त्यसपछि काठमाडौं गोर्खाजविरुद्धको दोस्रो खेलमा पनि राहुलले आफ्नो उत्कृष्ट प्रदर्शनलाई निरन्तरता दिए। उनले चार विकेट लिँदै विपक्षी टोलीको ब्याटिङलाई दबाबमा राखे। साम हिजलेट, स्मित पटेल, करण केसी र आदिल आलमजस्ता खेलाडीलाई आउट गर्दै उनले जनकपुरको जितमा महत्त्वपूर्ण भूमिका खेले। उक्त खेलमा उनी म्यान अफ द म्याच घोषित भए।

यसरी जीवनका सुरुआती दुई टी–२० खेलमै उनले कुल ६ विकेट लिन सफल भए। दुई खेलमा विकेटसँगै दुईवटा उत्कृष्ट क्याच समातेका राहुलले एकै दिन तीनवटा पुरस्कारसमेत हात पारे। म्यान अफ द म्याच, उत्कृष्ट क्याच र इनर्जेटिक मोमेन्टको अवार्ड प्राप्त गर्नु उनको प्रदर्शनको अर्को उपलब्धि बन्यो।

उनको बलिङ शैली र क्षमताको चर्चा विपक्षी टोलीका खेलाडी तथा अनुभवी क्रिकेटकर्मीमाझ समेत हुन थालेको छ। जनकपुर बोल्ट्सका कप्तान हर्मित सिंहले उनको गति र बलिङ क्षमताको प्रशंसा गरेका छन्। त्यस्तै पूर्व राष्ट्रिय क्रिकेटर तथा काठमाडौं गोर्खाजका प्रशिक्षक शरद भेषावकरले पनि राहुलको बलिङ क्षमता र भविष्यको सम्भावनाबारे सकारात्मक प्रतिक्रिया दिएका छन्। जनकपुरका अनुभवी विदेशी खेलाडी मोइन अलीले समेत उनको बलिङ शैलीको प्रशंसा गरेका छन्।

राहुलको सफलताको अर्को महत्त्वपूर्ण पक्ष भनेको उनले प्राप्त गरेको अवसर हो। जनकपुर बोल्ट्सले जिल्लास्तरमा पुगेर आयोजना गरेको ट्यालेन्ट हन्ट नभएको भए सायद उनी अझै स्थानीय मैदानमै आफ्नो प्रतिभा सीमित राख्न बाध्य हुन सक्थे। तर एउटा अवसरले उनको खेल जीवनलाई नयाँ उचाइमा पुर्‍याउने ढोका खोलिदिएको छ।

उनको सफलताले नेपाल क्रिकेट संघ (क्यान) लाई पनि एउटा महत्त्वपूर्ण सन्देश दिएको छ। देशका विभिन्न जिल्लामा आयोजना हुने प्रतिभा खोजी कार्यक्रमलाई अझ व्यवस्थित, नियमित र प्रभावकारी बनाउन सके राहुलजस्ता थुप्रै प्रतिभावान खेलाडी भेटिन सक्छन्। क्रिकेटको पूर्वाधार र प्रशिक्षण सुविधा सहरमा मात्र सीमित नराखी गाउँगाउँसम्म पुर्‍याउन आवश्यक छ।

नेपालमा क्रिकेटप्रति युवाको आकर्षण बढ्दै गएको छ। तर प्रतिभा भएर पनि उचित अवसर र पहिचानको अभावमा धेरै खेलाडी स्थानीयस्तरमै सीमित छन्। यस्तो अवस्थामा ट्यालेन्ट हन्टजस्ता कार्यक्रमले नयाँ खेलाडीलाई राष्ट्रिय तथा अन्तर्राष्ट्रिय स्तरसम्म पुग्ने बाटो खोल्न सक्छन्।

राहुल यादवको यात्रा अहिले सुरुआती चरणमै छ। दुई खेलको उत्कृष्ट प्रदर्शनले उनलाई चर्चामा ल्याएको छ। तर यो सफलतालाई निरन्तरता दिन नियमित अभ्यास, अनुशासन, उचित प्रशिक्षण र अवसर आवश्यक हुनेछ। उनको आगामी प्रदर्शनले नेपाली क्रिकेटमा नयाँ तीव्र गतिका बलरको सम्भावनालाई अझ स्पष्ट पार्नेछ।

बेतौनाको मैदानबाट सुरु भएको यात्रा अहिले टियु मैदानसम्म आइपुगेको छ। गाउँको मैदानमा लुकेको प्रतिभा एनपीएलको ठूलो मञ्चमा चम्किन थालेको छ। राहुलको यो सफलताले रौतहट मात्र होइन, समग्र मधेश प्रदेशलाई गौरवान्वित बनाएको छ।